ግድቡ የጣና ሐይቅን ሁለት እጥፍ የውሃ መጠን የመያዝ አቅም ይኖረዋል

በየማነ ናግሽ

አሁን ያለውን የአገሪቷን የኃይል አቅርቦት ከሶስት እጥፍ በላይ ያሳድጋል ሚባለውና ወጪው በሙሉ በመንግስት እንዲሸፈን የታቀደው ግዙፍ ግድብ በቤኒሻንጉል ጉሙዝ አካባቢ ሊገነባ ነው፡፡

‹‹ታላቁ የሚሊኒየሙ ግድብ›› የሚል ስያሜ የተሰጠውና ‹‹ፕሮጅክት ኤክስ›› በመባል የሚታወቀው ይህ ፕሮጀክት፣ ከሱዳን ድንበር ከ20 አስከ 40ኪሎ ሜትር ወደ ኢትዮጵያ ገባ ብሎ የሚገነባ ሲሆን፣ ግንባታው ሲጠናቀቅ 5,250 ሜጋ ዋት ኃይል ለማመንጨት የሚያስችል አቅም እንደሚኖረው መንግስት ይፋ አድርጓል፡፡

የኢትዮጵያ የውሃና ኢነርጂ ሚኒስቴር፣ የኢትዮጵያ የኤሌክትሪክ ኃይል ኮርፖሬሽንና የመንግስት ኮሚዩኒኬሽን ጽ/ቤት በጋራ በመሆን ዛሬ መጋቢት 21 ቀን በሸራተን አዲስ ሆቴል በሰጡት ጋዜጣዊ መግለጫ፣ ግድቡ በኢትዮጵያ እስካሁን ከተገነቡት መካከልል ትልቁ ሲሆን፣ ከ62 ቢሊዮን ኪዩቢክ ሜትር በላይ የውሃ መጠን (የጣና ሐይቅ የውሃ መጠንን ሁለት እጥፍ) የመያዝ አቅም እንደሚኖረው ገልጸዋል ፡፡

የኢትዮጵያ የውሃና ኢነርጂ ሚኒስትር አቶ አለማየሁ ተገኑ ጉዳዩን አስመልክተው እንደተናገሩት፣ ግድቡ ከ70 እስከ 80 ቢሊዮን ብር ወጪ የሚገነባ ሲሆን ኢትዮጵያን፣ ግብጽንና ሱዳንን ተጠቃሚ እንዲያደርግ ተደርጎ የሚሰራ ነው