የቀድሞዋ የአንድነት ለዴሞክራሲና ለፍትሕ ፓርቲ ሊቀመንበር ወይዘሪት ብርቱካን ሚደቅሳ፣ አሜሪካ ውስጥ ትምህርታቸውን እየተከታተሉ በሚቆዩባቸው ሁለት ዓመታት ምንም ዓይነት የፖለቲካ እንቅስቃሴ እንደማያደርጉ ተገለጸ፡፡

የአንድነት ፓርቲ ተቀዳሚ ምክትል ሊቀመንበር ዶ/ር ነጋሶ ጊዳዳ ለሪፖርተር እንደገለጹት፣ ወይዘሪት ብርቱካን ወደ አሜሪካ ከመሄዳቸው አንድ ቀን ቀደም ብሎ አግኝተው ባነጋገሯቸው ወቅት ትምህርታቸውን ጨርሰው ወደ አገራቸው የመመለስ ፍላጎት ያላቸው መሆኑን የገለጹላቸው ሲሆን፣ እዚያ በሚቆዩባቸው ሁለት ዓመታት ምንም ዓይነት የፖለቲካ እንቅስቃሴ እንደማያደርጉ አስታውቀዋቸዋል፡፡

‹‹የድርጅቱ ተቀዳሚ ምክትል ሊቀመንበር ነህና ለሥራ አስፈጻሚው የምትነግርልኝ መልዕክት አለኝ፤›› በማለት ወይዘሪት ብርቱካን አግኝተው ባነጋገሯቸው ዕለት፣ የፓርቲው ሊቀመንበር ሆነው እንደማይቀጥሉ የገለጹላቸው መሆኑን የጠቆሙት ዶ/ር ነጋሶ፣ ይህንን ተከትሎም የወይዘሪት ብርቱካንን ከኃላፊነት የመልቀቅ ጥያቄ ለሥራ አስፈጻሚው ማሳወቃቸውን ተናግረዋል፡፡ ወይዘሪት ብርቱካን ከኃላፊነታቸው የለቀቁ ስለመሆናቸው የተገለጸለት የፓርቲው ሥራ አስፈጻሚ፣ በቅርብ ጊዜ ውስጥ ለብሔራዊ ምክር ቤቱ ጉዳዩን ሪፖርት እንደሚያደርግና ብሔራዊ ምክር ቤቱም ‹‹ምን ይደረግ?›› በሚለው ጉዳይ ላይ ውሳኔ የሚያስተላልፍ መሆኑንም አክለው ገልጸዋል