መንግስት ዘይትን ከውጭ በማስገባት በተመረጡ ነጋዴዎችና የሸማቾች ህብረት ሥራ አማካኝነት ለሸማቾች እንዲዳረስ እያደረገ ነው፡፡ ስኳርን ደግሞ ፋብሪካዎች በሚያመርቱበት ዋጋ ለአካፋፋዩች በመስጠት በአዲስ አበባና በየክልሉ ላሉ የሸማቾች ህብረት ስራ ማህበራት እየተሰጠ ነው ብለዋል የንግድ ሚኒስትር ዲኤታ አቶ አሕመድ ቱሳ፡፡ስንዴም መንግስት ለዱቄት ፋብሪካዎች እያቀረበ ነው ብለዋል፡፡ ፋብሪካዎቹ ለዳቦ ጋጋሪዎች በተተመነላቸው ዋጋ ዱቄቱን እንደሚሸጡ በመጠቆም፡፡እናም የዋጋ ተመኑ የተፈለገውን የአጭር ጊዜ ዓላማ አሳክቷል ባይ ናቸው አቶ አህመድ፡፡ ይሁንና ሰሞኑን የምርት እጥረት ተከሰቷል በሚል በተለይ በዘይትና በስኳር ላይ የዋጋ መጨመር ታይቷል፡፡በንግዱ ህብረተሰብ ግልጽነትና ተጠያቂነት ያለው አሰራር ይዞ ለመቀጠል አስቸጋሪ መሆኑና ቸርቻሪዎች የግብር መክፈያ መለያ ቁጥር ላለማስመዘገብ ሲሉ ምርቱን አለመግዛታቸው የችግሩ ዋነኛ ምክንያቶች እንደሆኑ ነው አቶ አህመድ የሚገልጹት፡፡ከዚህ ቀደም የአንድ ወር የሀገሪቱ የስኳር ፍጆታ 240 ሺህ ኩንታል ነበር፡፡ ከመጋቢት አጋማሽ ጀምሮ 300 ሺህ ኩንታል ለገበያ እንዲቀርብ ተደርጓል ነው ያሉት፡፡ እናም ነጋዴዎች በአዲሱ አሰራር ከተጠቀሙ ችግሩ ይቀረፋል ብለዋል፡፡የአንድ ወር የሀገሪቱ የዘይት ፍጆታም 10 ሺህ ቶን ሲሆን አሁን በሀገሪቱ 12 ሚሊዮን ሊትር ዘይት እንደሚገኝ አቶ አህመድ ገልጸዋል፡፡ ዘይቱ ዛሬ በአዲስ አበባ መከፋፈል ጀምሯል፡፡በመጪው ሚያዝያ 18/2003 ዓ.ም 18 ሺህ ቶን ዘይት እንደሚገባ ሚኒስትር ዲኤታው ተናግረዋል፡፡ሌላ 90 ሺህ ቶን ዘይት ተገዝቶ ለመጓጓዝ መዘጋጀቱን የገለፁት ሚኒስትር ዲኤታው በአለም አቀፍ ገበያ የዘይት ዋጋ ቢጨምርም መንግስት ድጎማ እያደረገ መሆኑን አስታውቀዋል፡፡