የኢትዮጵያ ሕዝቦች አብዮታዊ ዴሞክራሲያዊ ግንባር (ኢሕአዴግ) ምክር ቤት ለስድስት የፖለቲካ ፓርቲዎች የአንድ ሚሊዮን ብር ድጋፍ ለመስጠት መወሰኑን የኢትዮጵያ ብሔራዊ ምርጫ ቦርድ አስታወቀ፡፡ምክር ቤቱ ለቦርዱ መጋቢት 29 ቀን 2003 ዓ.ም. በጻፈው ደብዳቤ እንዳስታወቀው፣ የምርጫ ሥነ ምግባር ደንቡን ፈርመውና የጋራ ምክር ቤት አባል ሆነው፣ በጋራ አገራዊ ጉዳዮች ዙሪያ በሰላማዊ መንገድ የተቃውሞ ፕሮግራማቸውን እየተገበሩ፣ ከኢሕአዴግ ጋር ተባብረው ለመሥራት ፈቃደኛ ሆነው ለሚገኙ ስድስት ተቃዋሚ የፖለቲካ ፓርቲዎች፤ ድጋፉን ለመስጠት መወሰኑን ገልጿል፡፡ኢሕአዴግ የገንዘብ ድጋፉን ለማድረግ የወሰነው ለመላው ኢትዮጵያ ብሔራዊ ንቅናቄ (መኢብን)፣ ለቅንጅት፣ ለኢዴፓ፣ ለኢሠዴፓ፣ ለኢራፓና ለኢፍዴኃግ ሲሆን፣ የሚሰጠውን ገንዘብ ያገኘውም ከብሔራዊ ምርጫ ቦርድ ጽሕፈት ቤት በሕጉ መሠረት በሕዝብ ተወካዮችና በክልል ምክር ቤቶች ባለው መቀመጫ ብዛት ለሥራ ማስኬጃ ከተሰጠው የፋይናንስ ድጋፍ ላይ መሆኑን አሳውቋል፡፡የኢሕአዴግ ምክር ቤት ባወጣላቸው መስፈርት አማካይነት ኢሠዴፓ 87,013.23 ብር፣ ኢራፓ 182,401.81 ብር፣ ኢፍዴኃግ 142,212.03 የሚደርሳቸው ቢሆንም፤ ፓርቲዎቹ አቅፈው ከያዟቸው የፖለቲካ ድርጅቶች ጋር የደረሳቸውን የገንዘብ መጠን አግባብ ባለው መንገድ ለመከፋፈል አለመቻላቸውን የሪፖርተር ምንጮች ገልጸዋል፡፡