ጋዜጣዊ መግለጫ

የአውራምባ ታይምስ ም/ዋና አዘጋጅ የሆነው ጋዜጠኛ ውብሸት ታዬ ትናንት (ዕሁድ) ከቀኑ 9፡00 ሰዓት አካባቢ በርካታ ቁጥር ባላቸው የጸጥታ ኃይሎች ተይዞ ከመኖሪያ ቤቱ መታሰሩን አውራምባ ታይምስ ከቤተሰቦቹ አረጋግጧል፡፡ጋዜጠኛው በቁጥጥር ስር ሲውል መኖሪያ ቤቱ ተበርብሮ የተለያዩ ሰነዶች፣ ሲዲዎች፣ ካሜራዎች፣ የአውራምባ ታይምስ የተለያዩ ዕትሞች መወሰዳቸውንም ለማረጋገጥ ተችሏል፡፡የአውራምባ ታይምስ ጋዜጣ ዝግጅት ክፍል ጋዜጠኛ ውብሸት የታሰረበትን ምክንያት እንዲገለጽለት ለሚመለከታቸው የመንግስት የጸጥታ ተቋማት ጥያቄ አቅርቦ በዛሬው ዕለት ባገኘው ምላሽ ‹‹ጉዳዩ ከጋዜጣዋ ጋርም ሆነ ከሙያው ጋር ተያያዥነት የለውም›› የሚል ምላሽ አግኝቷል፡፡ ሆኖም የታሰረበት ምክንያት በተጨባጭ ይህ ነው ተብሎ አለመገለጹ እጅግ አሳስቦናል፡፡የም/ዋና አዘጋጁ መታሰር በተቀሩት የጋዜጣዋ ባልደረቦች ስነልቦና ላይ መረበሽን ፈጥሯል፡፡ ስለሆነም በህገ መንግስቱ የተረጋገጠውን ሀሳብን በነጻነት የመግለጽ መብት ከግምት በማስገባት ጋዜጠኛው ለእስር የተዳረገበት ምክንያት እንዲሁም የሚገኝበትን ሁኔታ መንግስት እንዲያሳውቀን የአውራምባ ታይምስ ጋዜጣ ዝግጅት ክፍል ይጠይቃል