ባለፉት ጥቂት ሳምንታት ውስጥ በኢትዮጵያ ስፖርት አፍቃርያን ዘንድ አነጋጋሪ የነበረውና ከመቼውም ጊዜ በላይ ልዩ ትኩረትን ያገኘው የኢትዮጵያ ፕሪምየር ሊግ ውድድር፣ ባለፈው ሰኞ በኢትዮጵያ ቡና አሸናፊነት ተጠናቅቋል፡፡ይህ መላ አገሪቱን በሬዲዮና በቴሌቪዥን ጭምር ከዳር እስከዳር ያነቃነቀው የፕሪምየር ሊግ ውድድር የመጨረሻዎቹ ሳምንታት ትንቅንቅ፣ በኢትዮጵያ ቡና አሸናፊነት መጠናቀቁ ብቻ ሳይሆን፣ በኢትዮጵያ እግር ኳስ ላይ ትልቅ መነቃቃትን ፈጥሯል፡፡ ከዚህ በፊት ወደ አውሮፓ ሊጎች ፊታቸውን አዙረው የነበሩ የእግር ኳስ አፍቃሪዎችና ስለ እግር ኳስ ጨዋታ ደንታ የሌላቸው ሳይቀሩ አጓጊውን ውድድር በተለየ ስሜት ተከታትለውታል፡፡ ከመቼውም ጊዜ በላይ ከዳኝነት ስህተት፣ ከአድልዎና ከሸፍጥ የጸዳ በተባለለት በዚህ አጓጊ ውድድር ላይ የተፈጠረው ስሜት ወደሚቀጥለው ዓመት ይሸጋገር ዘንድ ብዙዎች ተመኝተዋል፡፡