የሕዝብ ተወካዮች ምክር ቤት ባለፈው ሳምንት ድንገት ሳይጠበቅ ያፀደቀው የከተማ ቦታን በሊዝ ስለመያዝ የሚደነግገው አዋጅ ጥያቄ እያስነሳ ነው፡፡
በተለይ አዋጁ ነባር ይዞታ በሚሸጥበት ወቅት ወደ ሊዝ ሥርዓት ይለወጣል ማለቱ አግባብ አለመሆኑን የተለያዩ የኅብረተሰብ ክፍሎች እየገለጹ ነው፡፡ ይህ አዋጅ ለፓርላማው የሚመለከተው ቋሚ ኮሚቴ ያልተመራ ከመሆኑም በላይ፣ ሰፊ ጉዳዮችን እንደማንሳቱ በቂ ውይይት እንዳልተደረገበት እየተተቸ ነው፡፡ በሕዝብ ተወካዮች ምክር ቤት ብቸኛው የተቃዋሚ ፓርቲ አባል የሆኑት አቶ ግርማ ሰይፉ አዋጁ እንዲፀድቅ የተደረገበትን አካሄድ ተችተዋል፡፡‹‹ደርግ የወረሰው የግለሰቦችን ትርፍ ይዞታ ነው፡፡ ኢሕአዴግ ከዚህ የባሰ የዜጎችን ይዞታ የመውረስ አሠራር ነው ተግባራዊ እያደረገ የሚገኘው፤›› ሲሉ በአዋጁ ፅንሰ ሐሳብ እንደማይስማሙ ገልጸዋል፡፡ከዚህ በተጨማሪም በይዞታ ሽያጭ ወቅት መንግሥት ተጨማሪ የሊዝ ክፍያ የሚያገኝበት አግባብ በመኖሩ፣ ግብይቱ የዋጋ ንረት እንደሚፈጥር ያነጋገርናቸው ባለይዞታዎች ስጋታቸውን እየገለጹ ነው፡፡ደንብ ሲወጣ አዲስ የይዞታ ልኬት የሚካሄድ ሲሆን፣ በልኬቱ ከ500 ካሬ ሜትር በላይ ይዞታ የያዘ ይቀነስበታል፡፡ እንደ አካባቢው ሁኔታ በፕላኑ መሠረት ያነሰ ይዞታ ያለው እንዲጨመርለት ከተፈለገ በክፍያ ይጨምርለታል፡፡ ‹‹የሚቀነስ ይዞታ በሕጉ መሠረት ተመጣጣኝ ካሳ ይከፈልበታል፡፡ ያነሰው ደግሞ በሊዝ ክፍያ ይጨመርለታል፤›› ሲሉ የሚኒስቴሩ አንድ ከፍተኛ ባለሥልጣን ገልጸዋል፡